И покрај средбата со Премиерот, штрајкот на лекарите продолжува!

Добивај вести на Viber

Штрајкот на лекарите продолжува и покрај тоа што Премиерот Никола Груевски синоќа се сретна со претставници на синдикати, на која начелно било договорено да се направат отстапки во моделот за плаќање по учинок, но новиот начин на исплата на платите и понатаму останува да важи. „Секако е за поздрав што премиерот конечно го легитимира, го виде и го призна штрајкот. Не е постигнат договор затоа што ова не беше преговарање, туку повеќе запознавање. Главна тема беше моделот, му ги поставивме нашите забелешки и можам да кажам дека премиерот беше отворен да преговара за одредени делови и да се прифатат измени“, изјави  д-р Дејан Ставриќ, претседателот на Самостојниот синдикат на Клинички центар. Сепак , посочуваат штрајкувачите, нема прекин на штрајкот се додека не се дојде до прифатливо решение. Тие повторија дека генерално не се против принципот плаќање по учинок, но бараат моделот да претрпи корекции, а не да се намалува плата која и онака е ниска во спореба со платите на лекарите во регионот. „Никогаш не сме биле против принципот наградување по учинок или успешност,  значи ние сме за тоа, со таа идеја дури и пред да се формира оваа влада, ние отсекогаш сме барале таков тип на наградување според заслуги, меѓутоа бидејќи овој модел го прави токму спротивното, бидејќи е штетен за пациентите ваков каков што е, бидејќи е квантитативен, а не квалитативен модел и не обрнува никакво внимание на квалитетот на здравствената услуга, затоа и бараме сериозни модификации“, повтори Ставриќ. На синоќешната средба покрај Премиерот и претставници на лекарите кои штрајкуваат , присуствуваа и министерот за здравство Никола Тодоров, како и претседателот на гранковиот синдикат за здравство Љубиша Каранфиловски. Тодоров, кој веќе цел месец го игнорира штрајкот во неговиот двор повтори дека нема намера да укине новиот модел за пресметка на платите на лекарите. „На средбата потенциравме дека ќе опстоиме на концептот за оние лекари кои ќе работат повеќе да бидат наградени, а оние кои недоволно посветено пристапуваат на работата да им биде намалена платата“, изјави Тодоров по средбата, но додаде и дека дополнително би можело да се разговара за листата на бодување како и прецизирањето на критериумите. Сега се чека идната средба за продолжување на преговорите. Во меѓувреме, поради расте револтот на пациентите кон лекарите кои штрајкуваат бидејќи дел од нив се враќани назад доколку не се работи за итна состојба, но исто така доцнат и платите на лекарите од Клинички кои вообичаено се исплаќаат најдоцна до 10-ти во месецот. Ј.Ј.