И Владата со предлог мерки за загадувањето – бара граѓаните помалку да излегуваат надвор

Добивај вести на Viber

Владата денеска усвои предлог мерки за справување со загадувањето, ги ослободи од работа до сабота бремените жени и лицата над 60 години од скопско, кичевско, тетовско и битолско. Им препорача и на градежните и останатите работници кои работат на отворено тоа да го прават од 11 до 17 часот, за да се заштитат и да не креваат прашина. Вработените од градинките и училишта ги посоветува до сабота да не изведуваат активности на отворено. Властите побараа поголема активност и од Црвениот крст, центрите за социјална работа и единиците на локалната самоуправа. Според министерот за животна средина и просторно планирање, за загадувањето на воздухот се виновни сообраќајот, домаќинствата и градежништвот, а не големите индустриски капацитети. Адеми препорача да се забрани движење на товарни возила од периодот од 7 до 21 часот, односно во Скопје да се пренасочат кон обиколницата. Во другите градови се препорачува товарните возила да не се движат низ центарот во тој период освен возила коишто пренесуваат леб и лекови. Локалните самоуправи се повикуваат интензивно да ги чистат улиците. Се најавува засилена контрола на компаниите и капацитетите што имаат А и Б еколошки дозволи или кои се во процедура на нивно добивање.Најголемо загадување во овие региони е забележано од 7.30 до 11  часот и од 17 до 21 часот. Невладините здруженија и граганските активисти, револтирани од тоа што се случува денеска делеа маски на минувачите, а на повеќе пунктови оставаа кутии со маски и со натпис „Дишењето во Скопје е штетно за вашето здравје“.