И во Кисела Вода ќе се даваат пари за новороденчиња

Добивај вести на Viber

И општина Кисела Вода се вклучува во мерката за доделување еднократна парична помош за новороденчињата. Така сите бебиња родени од 20-ти јуни, па до крајот на годината на територијата на оваа општина ќе добијат еднократно по 6.000 денари од општината. Новата бенефиција била одобрена од општинскиот совет на предлог на градоначалничката Билјана Беличанец Алексиќ. За реализација на мерката се предвидени вкупно 2 милиони денари. Услов за добивање на паричната помош е двајцата родители да се жители на општината. Во рок од 90 дена од раѓањето на детето потребно е родителите да поднесат барање до општината со документација која ќе го потврди раѓањето на новороденчето и територијалната припадност. Потоа треба да достават на увид и важечки лични карти или други исправи за лична идентификација, извод од матичната книга на родените за новороденчето и фотокопија од трансанкциска сметка. Целта на бенефиција е да се стимулира наталитетот и да се зголеми бројот на деца на територијата на општина Кисела Вода. Според податоците од Државниот завод за статистика бројот на живородени деца во оваа општина во 2012 година бил 583 бебиња, додека во 2007 година бројот изнесувал 517 новороденчиња.