Има ли одговор од ВМРО-ДПМНЕ и Мицкоски по писмото од Мијалков?

Добивај вести на Viber

Од ВМРО-ДПМНЕ втор ден молк по писмото на Сашо Мијалков, кој беше исклучен од партијата. 

Лидерот Христијан Мицкоски, но и партијата ништо не одговараат. Иако содржината во писмото беше директно насочена кон Мицкоски, тој  во јавноста не одговори на прашањата кои во отвореното писмо до него ги упати поранешниот шеф на УБК. Мијалков во писмото јавно го повика шефот на опозицијата да приложи докази за тврдењата дека поткупувал пратеници и подготвувал пуч.

„Во спротивно  вештачкото и со лажни аргументи создавање еуфорија против мене, презентирано како „Панорама 2“ нема никако поинаку да се разбере отколку како обично, подмолно, егоистично барање виновник и алиби за серија твои грешки и на раководството на партијата. Сами измисливте „Панорама 2“. Без противник. Се боревте против дух, бидејки немаше противник, а противник немаше бидејки таков не постоеше. Самите го лажевте членството преку соcијалните мрежи и медиумите блиски до партијата, дека јас сум подготвувал некаков пуч, дека ќе следело „Панорама 2“, и дека или вие или јас ќе сум победел. На почетокот мислев дека сето тоа е некаква шега, но сега гледам дека некои болни умови смислиле план што не би го смислило ни дете од 10 години“,  наведува Мијалков во писмото.

Во писмото Мијалков го обвини Мицкоски дека заедно со партијата на цедило ги оставиле пратениците кои се опфатени со судскиот предмет за 27-ми април. Мијалков вели дека со лаги, интриги и местење на други луѓе од партијата да се жртвуваат за Мицкоски да дојде на власт, партијата нема да успее.