ИМА РЕШЕНИЕ ЗА МЕТЕЖОТ НА ТАБАНОВЦЕ: Системот со едно застанување ќе почне и суштински да функционира на почетокот на идното лето
Објавено во: Македонија 10 Октомври, 2024
Има решение за гужвите на граничниот премин Табановце-Прешево. Системот со едно застанување ќе почне и суштински да функционира на почетокот на наредната летна сезона. Досега се потпишани повеќе согласности меѓу двете земји, но потребно е да се поедностави процедурата. Ова денеска го соопштија министрите за внатрешни работи на Република Северна Македонија и Република Србија, Панче Тошковски и Ивица Дачиќ, по нивната средба во СВР Куманово. Тие разговараа и за справувањето со миграцијата и заедничките патроли.
„Дачиќ има големо искуство во својата политичка кариера, но јас ќе бидам малку брутално искрен. Кај нас е кабаетот, како и за сè друго. Како што кај нас е кабаетот што не го воспоставиле системот ‘уан стоп шоп’ со Република Албанија, со Косово и со Република Србија и во овој случај кабаетот е кај нас оти имаме потпишано договор во 2019 година. Србија е подготвена и со техничко решение и со сè, а ние сме си спиеле, нешто што е познато во изминатите години. Но, тоа веќе заврши. Имаме енергија, имаме знаење, имаме поддршка и од меѓународните пријатели и од нашите соседи. На почетокот на идната летна сезона и навистина ќе го воспоставиме овој систем“, рече Тошковски.
Според српскиот министер за внатрешни работи Ивица Дачиќ, ова е трета нивна заедничка средба на кој прецизно се дефинираат чекорите што треба да се направат со цел да им се решат проблемите и да им се олесни животот на граѓаните на двете држави. „Ние веќе имаме потпишано некои согласности, но треба да се поедностави процедурата. Тоа да биде еден преглед на граничниот премин. За овој премин и едни и другите го дадовме тој налог бидејќи ние и двајцата се потпишувавме повеќе пати, но ајде сега навистина да се направи. Не дека можеби ќе нема воопшто метеж, но барем да се чека помалку“, изјави Дачиќ.
Вели дека процесот треба да се усоврши. Во текот на летото, голем број српски туристи патуваат на одмор во земјава или во соседна Грција и на границата има застој.
фото МВР