Има живот за грчките пензионери во Гевгелија

Добивај вести на Viber

Дека грчките пензионери убаво живеат во Гевгелија потврдуваат граѓаните на овој град.

Велат дека последните години има граѓани кои од Грција се доселиле и живеат во Гевгелија токму поради ниските трошоци за живот, кои секако им одат во прилог со примањата кои ги имаат.

Од локалната самоуправа велат дека детален увид немаат за тоа колку Грци се доселиле во градот, но според нив повеќето од овие граѓани живеат во живеалишта кои ги земаат под закуп, а купувањето на станови се случува поретко.

„Во градот има стотина Грци кои јас ги познавам, а се дојдени во последните 10 години. Тие одлучиле да живеат овде поради ниските цени. Со нивните примања овде убаво се живее“, вели Павле Николов, повозрасен жител на Гевгелија.

Од агенциите за недвижности објаснуваат дека грчките пензионери со нивните пензии во Гевгелија можат да си обезбедат убав живот, а станови земаат под кирија за пристапни цени.

„На Грците им се исплати да живеат овде под кирија. Обично остануваат по 3 месеци, потоа одат во Грција, си ја земаат пензијата, и по извесно време пак се враќаат. Јас знам најмалку 20 Грци кои се доселиле во Гевгелија, но реално ги има  многу повеќе, тој број е поголем. Се работи за постари граѓани кои бараат станови под кирија до 150 евра. Некои од нив станови бараат преку агенција, а некои тоа го прават самостојно. Оваа појава почна пред 10 години, тогаш почнаа да доаѓаат првите Грци“, велат од агенција за недвижности.

Од друга агенција очекуваат дека во иднина ќе расте бројот на Грци кои ќе одлучат да купуваат недвижен имот во Гевгелија.

„Сега засега повеќето Грци изнајмуваат имоти, но верувам дека ќе почнат и да купуваат. За празници, викенди, но и работни денови градот е полн со Грци. Има и средовечни луѓе, но има и помлади“ – наведуваат од оваа агенција.

Додаваат дека Гевгелија е прималива за нив затоа што храната, гардеробата, посетата на стоматолог, фризерските услуги, буквално сѐ е поевтино.

„Јас издавам куќа под кирија на два ката, доаѓаа Грци, да го разгледаат просторот, но тие претежно бираат станови. Се сместуваат и во центарот и на периферија, онаму каде ќе најдат стан кој им одговара“, вели Трајанка Грозданова, која издава куќа од 80-тина квадрати.

Сепак, сите се согласни дека Гевгелија има бенефит од Грците кои тука ги трошат своите пари. 

фото википедија