ИНВЕСТИТОР: Рускиот милијардер Дерипаска ја тужи Црна Гора

Добивај вести на Viber

Отштета од над 600 милиони евра од Црна Гора бара Централноевропската алуминиумска компанија (ЦЕАЦ) со седиште на Кипар, зад која стои рускиот тајкун Олег Дерипаска. Компанијата на Дерипаска, која е еден од најголемите акционери во Комбинатот за алуминиум Подгорица (КАП) ја обвинува црногорската Влада дека се мешала во инвестицискиот процес и со тоа нанела штета и на крај довела до банкрот на самата инвестиција. „Сметаме дека со постапките на Црна Гора се крши спогодбата и бараме надомест на целата штета и загубите кои ги претрпевме, вклучувајќи и надомест за незаконитата експропријација на инвестицијата на ЦЕАЦ и директен и надомест за штета заради неправедното и нерамноправно постапување на Црна Гора кон нашите инвестиции. Очекуваме дека износот на побарувања ќе надмине 600 милиони евра“, соопштија од компанијата, која е фирма-ќерка на Ен Плус Групацијата на Дерипаска. Првото барање за решавање на спорот компанијата го поднесе уште во август лани, но бидејќи не успеале да се договорат со црногорската Влада случајот стигна на арбитража. Од Владата во Подгорица ги отфрлија обвинувањата дека незаконито се мешале во работата на КАП и ги обвинија странските инвеститори за неспособно работење. „Заради лошо управување, долговите на КАП надминаа 350 милиони евра. Државата на КАП му даде и 135 милиони евра гаранции за да земе кредити и да ја надмине кризата кон крајот на 2008. Но заради несоодветно менаџирање, гаранциите беа активирани и кредитите паднаа на товар на даночните обврзници“, соопштија од црногорската Влада. Во јули лани Владата на Црна Гора прогласи стечај на КАП, а во октомври беше прогласен банкрот на комбинатот кој потона во долгови што изнесуваа 10% од вкупниот БДП на оваа земја. Имотот на КАП му беше продаден на претпријатието Унипром од Никшиќ, кое се занимава со производство на течен метал.