Иловица има злато и бакар!

Добивај вести на Viber

Прелиминарната економска анализа за наоѓалиштето на бакар и злато Иловица утврди дека околу 143 милиони тони руда со просечна содржина од 0,42 грам/тон злато и 0,23% бакар може да се категоризираат како количини што може рентабилно да се експлоатираат. Со проектирано годишно производство од 12 милиони тони руда, Иловица ќе произведува околу 4,2 тони злато и 24.000 тони бакар годишно. Се очекува во понапредните фази на анализирање на проектот да се утврди многу поголем потенцијал во однос на економски исплатливите количини руда. Прелиминарната економска анализа всушност е потврда и попрецизно дефинирање на утврдените податоци од досегашните истражувања што тимот на компанијата ги прави на терен. „Позитивната Прелиминарна економска анализа за Иловица дава основен показател за големината на проектот, оставајќи значителен простор за оптимизација. Заедно со Договорот за концесија за експлоатација за локалитетот Иловица доделен во јули оваа година и Одобрението за Студијата за оцена на влијанието на проектот врз животната средина, компанијата сега има соодветна платформа да ги надгради ресурсите, да ги дефинира почетните резерви и да продолжи со проектирањето. Ова ќе биде направено во рамките на Студијата за изводливост во првата половина на 2013 година по завршувањето на тековната програма за дупчење. Постоењето на основните показатели за потенцијалната финансиска вредност на нашиот главен проект во јавниот домен е важно достигнување за Еуромакс.", изјави Стив Шарп, претседател и главен и извршен директор на Еуромакс Ресурси Лтд. Ова го потврди Прелиминарната економска анализа за наоѓалиштето на бакар и злато Иловица во општина Босилово, со што се потврдува економската исплатливост на проектот во оваа прелиминарна фаза на анализирање на финансиските показатели. Во следниот период ќе следат нови подетални анализи што ќе треба да дадат уште попрецизни процени за висината на капиталните инвестиции и за оперативните трошоци со што се очекува да се добијат уште повисоки показатели за исплатливоста на проектот. На почетокот на октомври, Министерството за животна средина и просторно планирање ја потврди Согласноста за Студијата за оцена на влијанието врз животната средина за проектот „Површински коп на бакар и злато на локалитетот Иловица – општина Босилово“ со што се гарантира дека сите активности ги задоволуваат барањата за заштита на животната средина и се во согласност со регулативите од оваа област. Во јули годинава, Владата, односно Министерството за економија на Еуромакс му ја додели концесијата за експлоатација на бакар и злато на локалитетот Иловица, што претставува најважен проект за компанијата.