Источна Европа бележи пад на странски инвестиции за 20 проценти

Добивај вести на Viber

Новите земји членки на Европската унија како и земјите од југоисточна Европа во 2013 година бележат пад на странските инвестиции за 20 проценти, според актуелните прогнози на Виенскиот институт за споредување на меѓународните економии.

Најголем пад ќе доживеат инвестициите од Русија затоа што економската состојба во Русија се влошува, а на Москва и се закануваат загуби во контекст на банкарска, финансиска и должничка криза. Исклучок на оваа мрачна прогноза се Словенија, каде се инвестира во приватизација и Србија, каде се нудат можности за остварување гринфилд проекти.

Директните странски инвестиции до сега играа важна улога во економскиот развој и промената на структурата во земјите од централна и источна Европа. Но, според експертите на Виенскиот институт, странските инвестиции веќе не ја исполнуваат улогата на економски мотор во источна Европа. Инвестициите пред се се ориентираат кон понудата и побарувачката на пазарите и со тоа се изложени на негативните последици на рецесијата во Европа. Инвеститорите повеќе не ги привлекува источна Европа.

Кон крајот на минатиот месец, Конференцијата на Обединетите нации за трговија и развој (UNCTAD) објави извештај според кој глобалните директни странски инвестиции минатата година потонале за 18%, спуштајќи се под нивото од периодот пред економската криза, поради економската слабост и политичката неизвесност.

Лани за прв пат земјите во развој привлекле повеќе директни странски инвестиции отколку развиените земји, односно 52% од вкупната вредност. Транзициските економии лани забележале вкупно 87 милијарди долари директни странски инвестиции, што е 9% помалку отколку во претходната година. Притоа инвестициите во земјите во југоисточна Европа се скоро преполовени, од 7,2 на 4,2 милијарди долари, објави „Бизнис Инфо“.

Оваа година не се очекува значително опоравување, а следните години може дојде до подобрување ако се одобрат макроекономските услови, ако се обнови довербата на инвеститорите, па транснационалните корпорации да одлучат рекордните готовински износи со кои располагаат да ги насочат во нови инвестиции.