Историски ден: Србија ги почнува преговорите со ЕУ

Добивај вести на Viber

Српскиот премиер Ивица Дачиќ и вицепремиерот Александар Вучиќ од една страна, еврокомесарот Штефан Филе и шефот на грчката дипломатија Евангелос Венизелос од другата. Со првата меѓувладина конференција во Брисел денеска, Србија и официјално ги почнува преговорите за членство во Европската унија. „Наша цел е се што е наша обврска да завршиме до 2018-та година, а потоа веќе не е наша работа дали ќе бидеме примени во ЕУ во 2020-та“, изјави Вучиќ пред поаѓањето. Според шефот на српскиот преговарачки тим Тања Мишчевиќ, од денеска започнува да тече едно ново време во процесот на евроинтеграции на Србија. „Нема време за опуштање. На Србија допрва и претстојат бројни предизвици на патот кон европските интеграции. Белград ќе мора да остане целосно посветен на нормализацијата на односите со Приштина и да работи на достигање на европските стандарди. Тоа ќе биде процес кој бара многу“, предупреди еврокомесарот Филе. Протоколот предвидува на денешната конференција да биде претставен преговарачкиот тим и преговарачката платформа на Србија. Додека Србија ги започнува преговорите за членство, Македонија и натаму останува единствената земја со најдолг стаж во чекање на датум за да го започне истиот процес. Иако Европската комисија оценува дека земјава е подготвена, Европскиот совет се уште не дава „зелено светло“.