Добивај вести на Viber
Секоја петта компанија на Официјалниот пазар на своите акционери ќе подели дивиденда за работењето во 2014 година
Само 21 компанија од котираните 113 акционерски друштва на Официјалниот пазар на нашата берза дели дивиденда за 2014 година, покажа проверката на достапните податоци и објави во базата на податоци на Македонската берза што ја направи „Фактор.мк“.
На трите подсегменти на нашиот пазар на капитал се котирани вкупно 113 акционерски друштва.
На подсегментот „суперкотација“ единствена листана компанија е „Комерцијална банка“, на подсегментот „берзанска котација“ има 29 друштва и на подсегментот „задолжителна котација“ се тргуваат акциите на 83 компании.
„Најмрсна“ дивиденда во апсолутен износ дели „Реплек“ и таа изнесува 3.045,6 денари (по пресметан персонален данок од бруто износ). Втора на листата е скопската цементарница „Усје“ со добивка од 2.362,5 денари за акција (во нето износ), а трета е акцијата на скопски „Бетон“ во нето износ од 990 денари за акција.
Од аспект на профитабилност пиететот „најдобитна“ го понесе акцијата на скопски „Бетон“ со принос од 13,56 отсто на вложеното (калкулацијата е направена со последната пазарна цена на таа акција). Приносот кај акцијата на УСЈЕ изнесува 11 отсто, а солидни се износите и кај светиниколската индустрија за битуменски градежни материјали БИМ со износ од 8,86 отсто, „Македонски телеком“ со 8,52 отсто и НЛБ „Тутунска банка“ со 8,17 отсто.