ИТ Лабс – Инкубатор на нови луѓе и идеи во ИТ сектор на светско ниво

Добивај вести на Viber

Модерните и напредните технологии го диктираат трендот во светот, позицирајќи ги ИТ компаниите на врвот од новите брзорастечки светски индустрии. Она што меѓусебно ги разликува овие компании е квалитеот на услугите и продуктите што тие ги нудат на светскиот пазар. Една од успешните фирми што прават разлика во понудата и производите е македонската IT Labs, компанија што веќе е распространета на три континети.

За нивните почетоци, организациската структура, начините на работа и односот со вработените, разговараме со Владимир Илиевски, главен оперативен менаџер и ко-основач на компанијата IT Labs.

Фактор: ИТ Лабс е основна во 2004 година во САД. Кажете ни накратко за вашите почетоци таму, а потоа и за вашето претставништво во Македонија?

Владимир Илиевски: ИТ Лабс е компанија во македонска сопственост којашто по основањето во Америка, свое претставништво отвори и во Силиконската долина и голем број градови во САД, за по една година да отвори свое претставништво и во Македонија. Компанијата  започна со основна дејност како сервисна компанија, а потоа ја збогати својата понуда со изработка на сопствени продукти. Канцеларијата во Македонија уште на почетокот имаше голем потенцијал и ние тоа умешно го искористивме. Од самиот почеток нашата стратегија, идеја и цел беше канцеларијата во Македонија да биде главното претставништво за цела Европа и од тука да се шириме на европскиот пазар со нови и просперитетни професионалци преку креирање на нашите уникатни услуги и производи.

Фактор: Ова говори дека вашата канцеларија во Македонија всушност сега е срцето на ИТ Лабс?

Владимир Илиевски:Може да се каже така. Срцето и мозокот, да бидеме поконкретни. Она што е интересно е резултатот од интерната анкета спроведена за потребите, односно проширувањето на нашата канцеларија и седиште во Флорида, каде главна цел на истражувањето беше кој од вработените сака да се пресели во Америка и продолжи таму да работи. Интересен е податокот којшто укажува дека само 10тина луѓе посакаа да се преселат, а голем дел од нив својата иднина ја гледаат во Македонија бидејќи потенцијалот на овој бизнис ветува и нуди многу предизвици, а тоа доволно говори за потенцијалот што го имаме и го препознаваме на македонскиот и европскиот пазар.

Фактор: Која е вашата главна дејност? Што всушност им нудите на клиентите во поглед на бизнис услугите?

Владимир Илиевски:Нашата компанија нуди различни услуги за потребите на бизнис корисниците. Но, тука не станува збор само за понуда на идеја, туку и развој на целосен концепт, негово усогласување со потребите на клиентот, како и комплетен менаџмент на оперативноста на софтверот. Поконкретно, услугите што ги нудиме опфаќаат развој на стратегија на технологија и консултации, проектен менаџмент, проценки и евалуации, дизајн на систем, автоматизација и интеграции, дизајн на функционалност, оптимизација на бизнис процеси, дизајн на архитектура, документација, програмирање и гаранција за квалитет, графички дизајн и искуство на корисникот како и одржување, хостинг и поддршка.

Фактор: Започнавте со 12 вработени во Македонија, а сега броите дури 90. Како успевате и на што се должи брзиот раст на вработените во вашата компанија?

Владимир Илиевски:Токму така. ИТ Лабс сега во Македонија брои 90 вработени и тука нема да застанеме затоа што овој бизнис е брзорастечки како во светот, така и во Македонија. Она што ја прави разликата од другите компании е фактот дека ИТ Лабс ги поседува сите сертификати и врз основа на тие, креира обуки за вработените според сите светски стандарди и методологии, а тие содржат интерни предавања, конференции, посета на семинари, комуникациски алатки и методи, талент менаџменти, како и организација на различни работилници и тим билдинзи за потребите на нашите тимови.

Фактор: Каков е бенефитот од обуките и што се придонесува со нив во генералниот напредок на компанијата?

Владимир Илиевски:Најголем процент од нашите вработени се луѓе што кај нас се целосно обучени. Ние имаме вработени што почнале како практиканти, а сега се експерти во областа која ја работат и ја преставуваат нашата компанија. Тоа се должи на нашата професионална, детална и иновативна обука којашто е наменета за ентузијасти и луѓе што сакаат да учат и да се надградуваат. Со таа успешност и интензитет на обуки се поттикнува креативниот дух, а со тоа се овозможува да дојде до израз вистинскиот талент и потенцијал кај вработениот којшто потоа ќе биде искористен за да се создаде компактност и меѓусебна поддршка меѓу старите и новите вработени.