Италијанци организирано преку агенција ќе доаѓаат да се вакцинираат во Србија
Објавено во: Балкан, Корона Вирус 15 Април, 2021
Италијанска туристичка агенција нуди вакцина-туризам за Србија. Oд цела Италија засега има 500 пријавени.
Станува збор за агенција од Болоња која нуди пакет аранжман за сите Италијанци кои сакаат да се вакцинираат против ковид-19 во Србија, пишува весникот „Кориере дела Сера“.
Сопственикот Умберто Салвадори сам го тестирал системот, ја одбрал вакцината и откако е вакциниран во Белград, неговата агенција понуди пакет од четири дена. Единствениот услов за патување е лицето да има потврда дека е регистрирано за вакцинација.
Цената на четиридневниот пакет за две лица е 500 евра, а тоа вклучува превоз со авион или автомобил, како и ковид-тест. Сопственикот на агенцијата тврди дека интересот е огромен, дека нивните телефони постојано ѕвонат, заинтересирани се и компании од мала и средна големина. Србија се покажа како многу успешна во процесот на имунизација. Во Србија се вакцинираа над 23.000 граѓани од регионот.