Итен состанок на ЦЕФТА, Македонија ќе дозволи непречен увоз на српско брашно?

Добивај вести на Viber

Белград денеска беше домаќин на итниот состанок на земјите членки на ЦЕФТА, а како една од главните теми на разговор беше поставено ограничувањето на увозот на пченица и брашно од Србија. Мерката ја воведе македонската влада на почетокот на јули. Македонија притоа се обрза дека во разумен рок ќе ја елиминира спорната одлука за ограничување на увозот на пченицата и брашното, изјави денеска помошник министерот за внатрешна трговија на Србија, Бојан Тодоровиќ. Тој рок не е прецизиран, но бидејќи станува збор за специфични производи се очекува тоа да биде месец или месец и пол дена, рече Тодоровиќ . Иако српската и македонската страна веќе постигнаа договор за укинување на одлуката до 15 август, односно до 1 септември за делот кој се однесува на увозот на брашно, на состанокот ова мораше да биде официјално потврдено, за да не дојде до недоразбирања, пишуваат српските медиуми. Според Расим Љајиќ, министерот за трговија на Србија, државата побара вонреден состанок на ЦЕФТА пред да се потпишат билатералните договори со Македонија. „Средбата е експресно закажана и ние не сакавме да ја откажеме. Значи ние на овој состанок носиме заклучоци кои ќе потврдат дека одлуката на Македонија да го ограничи увозот на пченица и брашно е во спотивност со правилата на СТО и ЦЕФТА. Од суштинско значење е фактот што ако истото се случува повторно следната година, ќе имаме право на реципрочни мерки ", рече Љајиќ. Вчера министерот за земјоделство Љупчо Димовски истакна дека мерката останува на сила се додека не се стабилизира домашниот пазар со пченица и брашно, а уверуваше и дека Србија нема да воведе реципрочни мерки за виното и доматите.