Итен состанок во ЕЦБ поради банкрот кој ја демне Грција

Добивај вести на Viber

Управниот одбор на Европската централна банка се собира денес поради зголемената веројатност од обврските на Грција, пренесе АФП, повикувајќи се на информации од ЕЦБ.

Управниот одбор, во составот на кој влегуваат шест членови на Извршниот комитет на банката и 19 шефови на централни банки на земјите од еврозоната, е овластен да донесува одлуки за доделување на вонредни заеми на грчките банки.

Во сегашнава ситуација - недостаток на договор меѓу Грција и кредиторите за нејзиното продолжување на финансиската помош по 30 јуни и закажаниот од премиерот Ципрас референдум на 5 јули - голема е веројатноста Атина да западне во обврските по плаќањата и земјата да биде зафатена од банкарска паника. Пред банкоматите од вчера се вијат долги редици од луѓе што влечат пари.

Ројтерс пренесува дека во една третина од банкоматите во Грција резервите од евра завршиле. Во 35% од терминалите веќе не може да се повлечат пари, прецизира агенцијата. Банките ветија сепак да ги пополнат резервите. Само за еден ден од грчките банки биле повлечени речиси 600 милиони евра.

Грчкиот министер за финансии Јанис Варуфакис увери дека неговата земја продолжува да се бори за постигнување на договор со доверителите до крајниот рок - вторник, 30 јуни, кога завршува втората спасувачка програма за Грција. Тоа е и датумот на кој земјата треба да отплати долг од 1,5 милијарди евра на ММФ. Невозможно е плаќањето да се изврши без доверителите да доделат средства.

Според Варуфакис ЕЦБ треба да дејствува и да плати директно на ММФ 1,5-те милијарди евра. ЕЦБ ни должи 1,9 милијарди евра. Нека ги даде на ММФ, изјави тој за новинарите.