ИВАНОВ СЕ ЈАВИ: Пречките за доделување на мандатот уште не се отстранети

Добивај вести на Viber

„Претседателот Иванов останува на ставот изнесен во обраќањето до граѓаните на Република Македонија на 1 март 2017 година. Пречките за определување мандат за состав на влада сè уште не се отстранети“.

Ова е ставот од кабинетот на шефот на државата, по прозивките од СДСМ Иванов да му го додели мандатот на Зоран Заев.

Претседателот Иванов не го предомислуваат ниту ЕУ, САД, а ниту пак експертите.

Иванов останува да го дели истиот став како и партијата од која доаѓа ВМРО ДПМНЕ.

Во последното обраќање пред јавноста, првиот човек на нацијата рече дека со платформата на албанскиот блок се загрозува сувереноста и независноста на државата

„Со оваа платформа, Република Македонија е уценета, а нејзината унитарност, сувереност и независност се загрозени“, рече Иванов.

Тој дури испраќаше и писмо со молба за поддршка и осуда за платформата до членките на ЕС, до ГС на НАТО и до стратегиските партнери САД и Р.Турција.

„Како претседател на Република Македонија, земја долгогодишен кандидат за членство во Европската Унија и НАТО, очекувам да се ангажирате и да ни помогнете бидејќи иднината и перспективата на моите сограѓани се пред мошне сериозен предизвик“, пишуваше во писмото на Иванов.

Сепак, на ова писмо до шефот на државата беше пратена децидна порака и повторен став, да го додели мандатот на Заев кој што веќе има обезбедно парламентарно мнозинство.