ИЗГРАДБАТА НА АВТОПАТОТ ДО ОХРИД ЌЕ ПОСКАПИ, НО НЕ СЕ ЗНАЕ КОЛКУ: Мицкоски, Николоски и Трајановски повторно на увид на градежните работи

Добивај вести на Viber

Премиерот Христијан Мицкоски, министерот за транспорт и врски, Александар Николоски и директорот на ЈП за Државни патишта, Коце Трајановски повторно отидоа на увид на градежните работи на автопатот Кичево-Охрид, овојпат на делницата Климештани-Охрид, каде според нив, активно се работи на секој метар од патот.

„Активно се работи од Климештани од Охрид на секој метар. Сите сме сплотени за да може оваа делница да ја пуштиме што поскоро. Гледано од Кичево кон Охрид, се бетонираше потпатникот. Активно таму се асфалтира и очекуваме за неколку дена и тие километар ипол да бидат асфалтирани, со што целата лева лента од Климештани до Охрид ќе биде затворена со асфалт и ќе може да се вози по неа“, рече Трајановски.

Министерот за транспорт и врски посочува дека овој пат бил проектиран без ниту еден излез и ниту еден потпатник.

„Со потпатниците, надпатниците и излезите се решаваат сите села. Нема да има село или населено место кое нема да е споено или директно на автопат или со пристапен пат. Крајниот рок е 2026 година, така е по договор и така ќе биде“, рече Николоски.

Според премиерот Мицкоски, има успешен проект кој конечно ќе биде пуштен по една деценија.

„Не се знае колку ќе поскапи изградбата, бидејќи проектите се уште ги работат. Кога ќе бидат готови проектите, тогаш на јавноста ќе и биде сето тоа презентирано, но тоа се проекти кои мораме да ги направиме, бидејќи 15.000 луѓе не може да летаат од нивните населени места до автопатот“, рече Мицкоски.