Јакнење на стратешкото партнерство помеѓу Владата и Обединетите нации за постигнување на Целите за одржлив развој

Добивај вести на Viber

Новоименуваната Постојана координаторка на Обединетите нации во Република Северна Македонија, Росана Дуџак, оствари прва средба со Министерот за надворешни работи, Никола Димитров. На средбата разговараа за следните чекори и начини за дополнително јакнење на стратешкото партнерство помеѓу Владата и Обединетите нации, особено по однос на постигнувањето на Целите за одржлив развој.

„Повеќе и подобри работни места, поголема вклученост на граѓаните во носењето на одлуките, подобар живот за ранливото население, родова рамноправност и почиста, позелена и отпорна животна средина се нашите пет стратешки приоритети зацртани за 2016-2020”, изјави Постојаната координаторка Дуџак. „Семејството на Обединетите нации ќе продолжи да работи заедно со нашите партнери од Владата, граѓанското општество, и меѓународната заедница, за – во духот на Целите за одржлив развој – никој не биде изоставен.”

Росана Дуџак има повеќе од 20 години професионално искуство во меѓународниот развој. Претходно работеше во главната канцеларија на УНДП во Њујорк како лидер на тимот за политики на интеграција и програмска поддршка и лидер на тимот за превенција на кризи за Латинска Америка и Карибите.

Дуџак беше и Заменик постојан претставник на УНДП во Тунис за време на демократската транзиција и арапската пролет, како лидер на тимот за добро владеење во Етиопија и како специјалист за превенција на кризи во Колумбија.

Пред да се приклучи во семејството на Обединетите нации, Росана Дуџак работеше во Светска банка, Интер-Американската банка за развој и во консултантска фирма за инфраструктура со бројни мисии во светот, вклучувајчи ги Виетнам, Гвинеа и Гватемала.

Има завршено постдипломски студии во Планирање на градови на Институтот за технологија во Масачусетс (МИТ) и диплома од Универзитетот Џорџ Вашингтон во областа на меѓународните односи.