Јанакиески: Македонија прва во Европа ќе воведе електронско издавање на урбанистички планови

Добивај вести на Viber

Од следната година сите постапки за изготвување и одобрување урбанистички планови ќе се одвиваат по електронски пат, по примерот на останатите воведени електронски алатки во овој ресор, соопшти денеска министерот за транспорт и врски, Миле Јанакиески. - Ако во 2013 година предизвик беше воведувањето електронски систем за издавање одобренија за градење, за следната година тоа ќе биде целосна дигитализација на постапката за донесување и одобрување на урбанистичките планови - рече Јанакиески во обраќањето на конференцијата „Вистински импакт за подобро владеење“. Електронски систем за урбанистичките планови, според него, нема во ниту една држава во Европа, а со неговото воведување ќе се овозможи урбанизација на просторот на потранспарентен и поефикасен начин што ќе ги зголеми инвестициите и ќе го забрза економскиот развој. Од стартот на електронскиот систем за дозволите за градба на 1 јуни до 1 ноември годинава се поднесени 1.504 барања и веќе се издадени 389 одобренија. Просечното време за добивање на дозволата, истакна Јанакиески, во ноември е 18 дена, а претходно целата постапка се одвиваше за 45 дена, но имаше случаи и за 90 дена.