Јанкулоска се жали дека не може да шета надвор од Скопје

Добивај вести на Viber

Одбраната на екс-министерката за внатрешни Гордана Јанкулоска во рок од три дена ќе се жали на одлуката на Судот. Тој вчера, освен казната од 6 години затвор за злоупотреба на функцијата при набавката на блиндираниот мерцедес ù забрани и да го напушта живеалиштето, односно градот Скопје. Според нејзиниот адвокат Боро Тасевски, нелогично е постојано да се изрекуваат мерки на претпазливост, со оглед на тоа што Јанкулоска е обвинета во други предмети и досега ги почитувала мерките изречени од Судот.

„Гордана Јанкулоска веќе има мерки на претпазливост, како одземен пасош и задолжително јавување во судот и тие мерки таа ги почитувала. Со оглед на тоа, нелогично е да се трупаат дополнителни мерки за неа имајќи ја во предвид и околноста дека е мајка и ние веќе ја подготвуваме жалбата“, рече Боро Тасевски, Адвокат на Гордана Јанкулоска.

Одбраната на Јанкулоска сè уште не ја добила пресудата. Од Кривичниот суд најавуваат дека таа ќе биде готова до крајот на неделава или евентуално следниот понеделник. Откако ќе ја добие пресудата, екс-министерката има рок од 15 дена да се жали до Апелација. За набавката на луксузниот мерцедес веќе правосилно се осудени и поранешниот помошник во МВР Ѓоко Поповски и тоа на четири ипол години, но и поранешниот премиер Никола Груевски на две. Поповски е веќе во притвор, додека Груевски чека упатен акт од скопска единица на која затворска капија да се упати за да ја одлежи казната. Сепак, тој има можност за жалба и до Врховниот суд.