Јаз меѓу северот и југот на Србија

Добивај вести на Viber

Разликите во заработувачката меѓу северот и југот на Србија, укажуваат на нерамномерната развиеност на економијата во земјата, оценува Институтот за пазарни истражувања (ИЗИТ), пренесуваат српските медиуми. На северот од Србија, просечната нето заработувачка во ноември достигнала ниво од 48.906 динари, додека на југот била 37.861 динар, објавено е во новиот билтен на ИЗИТ. Посебно се издвојува белградскиот регион со просечна нето плата од 54.647 динари, што е за околу 45 посто повеќе отколку во регионот на Шумадија и Западна Србија каде е евидентирана најниска просечна нето заработка во износ од 37.719 динари. Тоа укажува на нерамномерната развиеност на економијата во Србија и концентрацијата на капитал и човечки ресурси во Белград или посеверно од него. Просечната нето плата во Војводина во ноември, била 42.669 динари, а во јужна и источна Србија, 38.030 динари. Таква разлика во висината на просечните нето плати по региони во Србија, е последица на природниот процес на деиндустријализација како производ на неконтролираната приватизација и пребрзата либерализација на пазарот. За да се сопрат таквите неповолни тенденции во развојот на земјата, неопходно е низ стратешко промислување да се поправи деловниот амбиент во помалку развиените подрачја од земјата, а тоа може да се направи и преку јавно-приватни партнерства во тие региони, даночни олеснувања, изградба на сите видови на инфраструктура и тренинг на локалните човечки ресурси, наведува ИЗИТ.   А.А.