К15: Ќе се договорат ли работниците и работодавачите?

Добивај вести на Viber

Исплатата на регресот за годишен одмор К15 најверојатно нема да се укине. Разговорите помеѓу Организацијата на работодавачи и Сојузот на синдикатите ќе продолжат со цел да се утврдат модалитетите, начинот и висината за исплата на регрес за годишен одмор. Општиот колективен договор во кој е утврдена исплатата на регресот К15 е потпишан помеѓу ССМ и Организацијата на работодавачи, затоа и преговорите за К-15 односно регресот се исклучиво одговорност на ОРМ но и на пошироката деловна заедница, вели Миле Бошков, претседател на Бизнис Конфедерацијата на Македонија. Фактор: Исплатата на регресот за годишен одмор К15 почна од лани, а веќе годинава бизнис секторот бара промена на моделот за исплата или целосно укинување на обврската, кои се аргументите на работодавачите? Бошков: На преговорите помеѓу ССМ и Организацијата на работодавачи,  Бизнис Конфедерацијата на Македонија не присуствуваше, бидејќи преговорите за Општиот колективен договор е потпишан помеѓу Организацијата на работодавачи и Сојузот на Синдикати на Македонија, оттука произлегува и ставот на Бизнис конфедерација на Македонија дека преговорите за К-15 односно регресот се исклучиво одговорност на ОРМ но и на пошироката деловна заедница. Основно во трудовата легислатива е слободното право на работодавачите и работниците да се договараат за износот на надоместокот за плати и социјални придонеси. Но во Македонија овие принципи делумно се почитуваат и спроведуваат , но најважно за нас е дека износот на регресот е 40% од просечната месечна плата во Македонија, што значи дека во некои гранки, компании регресот изнесува повеќе од самата утврдена минимална плата. Фактор: Кој модел е прифатлив за вас како Бизнис конфедерација? Бошков: За БКМ најприфатлив модел е слободата на работниците и работодавачите да се договорат за исплата на регрес, награда, мотивациски надоместоци и друго. На тој начин би се зголемила и улогата на самиот синдикат, работнички совет или претставникот на работниците во компаниите. Фактор: Очекувате ли да се најде  заеднички модел од кој би биле задоволни и работниците и работодавачите? Бошков: Ние многупати сме разговарале на оваа тема со синдикатот, секако дека може да се најде најдобро решение, најважна е флексибилноста и долгорочното партнерство со претставниците на работниците. Фактор: Како исплтата на регресот влијае врз финансиската кондиција на компаниите? Бошков: За фирмите секој дополнителен трошок е зголемен притисок и товар, се потешкиот пристап до финансии е дополнителна потешкотија за компанијата. Најголемата одговорност за овој штетен за стопанството  Општ колективен договор е Организацијата на Работодавачи и нивниот Управен Одбор.