Како до повеќе жени информатичарки?

Добивај вести на Viber

Информатичкиот сектор нуди високо квалификувани, добро платени работни места, но се уште не успева да привлече и да вработи многу жени. Во Македонија, само 23 отсто од вработените во информатичко- комуникацискиот сектор се жени иако можностите за нивен ангажман се многу големи. Сепак, ваквиот низок процент не е карактеристичен само за нашата земја. Напротив, во некои поразвиени европски земји, овој процент е дури и помал. Така, на ниво на Европска унија, жените сочинуваат само 16 отсто од вкупно 2,7 милиони луѓе кои се вработени или се образовани за информатичко- комуникациски технологии.

Бројките од Евростат покажуваат дека мажите доминираат во Дигиталната ера. Во Чешка дури 93 отсто од вработените во ИКТ секторот се мажи, а висок машки удел има и во Унгарија и во Полска (и во двете по 90 отсто). Во Германија овој процент изнесува 86 отсто, во Шведска 78 отсто, во Хрватска, 87 отсто, а во Естонија 83 отсто. Од земјите- членки, најмал удел на мажи во ИКТ секторот е забележан во Бугарија (66 отсто), Ирска (73 отсто) и Романија (75 отсто).

Работа од дома, флексибилно работно време, слободни денови за семејни потреби, ова се само дел од мерките со кои што може да се привлечат  и задржат жените во ИКТ секторот и воопшто во било која индустрија. Поттик за поголем удел на женскиот ум и сила во растечката индустрија за информатички технологии даваат Обединетите нации, а и Европската комисија со покренување на програмата „Девојки во ИКТ“. Целта на оваа програма е да се поттикнат девојките во што поголем број да се запишуваат на информатички студии и потоа да играат поактивна улога во Дигиталната ера.

Стопанска комора за информатички и комуникациски технологии (МАСИТ), како глас на македонската ИКТ индустрија, ја поддржува оваа кампања во земјава.

- Следно ниво на оваа иницијатива е како да ги поддржиме мајките што работат со цел нивен полесен баланс на приватниот и службениот живот. Само добар пример може да покрене масовни измени во оваа насока. Да бидеме креативни и да пробаме нешто ново- вели Анита Никова, извршен директор на МАСИТ.

Таа вели дека жените се најнеискористениот талент од аспект на обрзование и експертиза со кој впрочем веќе располагаат компаниите, а не се ни свесни за тоа.

- Тие се вредни, емоционално интелегентни, способни за мултитаскинг и бескрајно лојални. Статистиките покажуваат дека мешаните тимови кои вклучуваат мажи и жени секогаш функционираат подобро. Успешните компании во светски рамки имаат жени во сите нивоа на постоење и функционирање, а пред се, тоа го практикуваат на најмалку 30 отсто од раководните позиции. И ние можеме во Македонија да си поставиме таков таргет доколку сакаме и во одреден временски распон да го оствариме- посочува Никова.

(М.Б.)