Како Санадер влечел пари од државата за партијата?

Добивај вести на Viber

Случајот „Фими Медиа“ е веројатно најголемата корупциска афера во Хрватска, а по две години судење експремиерот Иво Санадер и неговите најблиски соработници денеска беа осудени за извлекување на пари од државните институции и со нив ги полнеле сопствените џебови и касата на партијата ХДЗ. Во текот на судскиот процес, поранешната благајничка на ХДЗ Бранка Павошевиќ признала дека со пари од црните партиски фондови се исплаќале многу функционери од партијата. Поранешниот ризничар на ХДЗ Младен Баришиќ, пак, открил дека со парите биле исплаќани и медиуми, коалициски партнери и естрадни ѕвезди кои настапувале за промоција на оваа партија. Имињата на хрватските пејачи Жак Худек, Нина Бадриќ, Мишо Ковач добиле пари за да настапуваат на предизборните митинзи на ХДЗ, додека Марко Перковиќ - Томпсон примил над 65 илјади евра само за да не настапува за подесничарската конкуренција на ХДЗ. Баришиќ признал дека со парите од агенцијата Фими Медиа ги плаќал и крстарењата на Санадер низ луксузни дестинации, како и уметничките дела што поранешниот премиер ќе ги изберел при прошетка низ галериите со блиски пријатели. Павошевиќ во судењето истакнала дека исплати од црните партиски фондови добивале и повеќе тогашни хрватски министри. Иако тие ги демантираа нејзините тврдења, таа своите наводи ги поткрепи со „црн бележник“ во кој биле регистрирани сите плаќања и кој го криела закопан во сопствениот двор. Санадер се бранеше дека на ниту еден од документите нема негов потпис и никакви траги за да се докаже ваквото движење на парите. Тој тврдеше дека капиталот го стекнал во годините кога работел како претприемач во Австрија, пред да стане хрватски премиер, а ниту една од недвижнините на негово име не била купена по 1994 година. По пресудата, ХДЗ на државата треба да и врати над 3 милиони евра. Санадер ќе треба да врати 835 илјади евра во готовина, но ќе остане и без уметнички дела и недвижен имот вредни над еден милион евра. Освен ова, поранешниот хрватски премиер доби и 9-годишна затворска казна.