Каков Буџет предвидува Ставрески за 2013-та Година?

Добивај вести на Viber

Скоро е завршен предлог буџетот за 2013 година изјави Министерот за финансии Зоран Ставрески.  Тој нема да биде поголем од годинешниот кој беше позициониран на 2, 5 милијарди евра. Буџетот за следната година ќе биде соодветен одговор на случувањата во европската економија, рече  Ставрески. “Буџетот ќе биде соодветен одговор на случувањата во европската економија со балансиран пристап на заштита од аспект на сите социјални категории, пензионерите и обезбедување на средства за земјоделците, а од друга страна и развојната компонентна со инвестициите, кои ќе бидат адекватно застапени“, рече Ставрески, додавајќи дека подготовките на буџетот за следната година се веќе во завршна фаза, а за некој ден буџетот ќе биде доставен пред Влада. “Подготовките на буџетот за 2013 година течат добро и се во завршна фаза. Извршивме разговори во неколку циклуси со сите министерства како и секогаш можностите и потребите не се исти, но во целина сме согласни со министрите дека буџетите за 2013 година ќе треба да бидат оптимални согласно условите и кризата“, додаде вицепремиерот. Според Ставрески, Буџетот е поставен на буџетски параметри кои предвидуваат економски раст од околу 2%, буџетски дефицит од 3,5% од БДП, а инфлацијата се предвидува да достигне 3%. Финансирањето на дефицитот во државната каса за догодина ќе се обезбеди преку заеми од Светската банка, но и со позајмување на околу 250 милиони евра од комерцијалните банки. Во таа операција Светската банка ќе се појави како гарант, што ќе обезбеди подобри услови за позајмување на пазарите на капитал.