Какви пораки му пренесе Османи на Катругалос?
Објавено во: Македонија 01 Ноември, 2018
Дека до крајот на годинава Македонија ќе ги заврши уставните измени, се надева вицепремиерот Бујар Османи.
Тој денеска леташе во авион на релација Скопје - Атина, каде се сретна со лтернативниот министер, Јоргос Катругалос.
Го информирал Катругалос за напредокот во однос на имплементацијата на Договорот од Преспа, откако Парламентот со двотретинско мнозинство даде зелено светло за уставните амандмани.
„Јас верувам дека ќе има експлозија од позитивни можности во соработката на нашите две земји, што ќе станат нови стратешки партнери во регионот“, вели Османи.
Вицепремиерот објасни дека е фокусиран на подготовка на земјата за преговори со ЕУ и побарал од Катругалос Грција да го сподели искуството.
„Разговаравме за промоција и почитување на духот на Договорот од Преспа како договор кој не само што решава еден проблем што ги измачуваше двете земји, туку го стабилизира поширокиот регион и обезбедува европски перспективи на земјите од нашиот регион“, вели Катругалос.
Тој вели дека тоа е цврста политика на Грција.
Османи и Катругалос ја споменаа и одново воспоставената авионска линија меѓу Скопје и Атина, за која вицепремиерот рече дека на „најдобр начин го симболизира поврзувањето на новите стратешки партнери во регионот".
Летот е во 18.40 часот по локално време, а во Скопје пристигнува по 1 час и 15 минути, односно во 18.55 часот по македонско време. Ова е прв лет по 10 години. Со затоплувањето на односите меѓу двете земји обновена е оваа авиолинија.