Канаѓаните „полудеа“ по хрватски работници – работеле за 50% помала плата!

Добивај вести на Viber

Големо незадоволство меѓу канадските работници предизвика потегот на компанијата Pacer-Promec која на нафтените полиња со кои стопанисува се одлучи да отпушти 65 канадски државјани и сите да ги замени со работници од Хрватска затоа што прифатиле да работат за 50% пониска плата! Според информациите на Dnevnik.hr, канадските работници за истите задачи добивале по 36 долари на час, додека хрватските прифатиле да работат за 18 канадски долари. Скандалот стигнал и до федералните министри во Канада кои биле принудени да реагираат. „Иако во Канада постои програма за привремено вработување на работници од странство, таа сепак не важи за сите дејности, особено ако има канадски државјани кои се подготвени да ја извршуваат таа работа“, рекол министерот за труд Томас Лукашук и додал дека таа програма не смее да стимулира вработување на евтина работна сила од странство. Компанијата Pacer-Promec била принудена да ја признае грешката и да ги врати канадските работници на работа, а хрватските да ги распореди на други проекти. Инаку, компаниите во Канада за кои ќе се открие дека ја злоупотребуваат програмата за вработување на странци, се ставаат на црна листа и немаат право веќе да вработуваат странски државјани.