Кандидатите за полицајци пред МВР протестираа за вработување

Добивај вести на Viber

Да се реши статусот на 660 кандидати за полицајци денеска пред МВР беше побарано преку протест. 

Станува збор за кандидати од генерацијата 2015/2016 кои успешно ја завршиле обуката и на 8 октомври 2016 година положиле свечена заклетва.

Ѓорѓија Коларовски е еден од кандидатите и во име на неговите колеги побара што поскоро да се реши нивниот статус. Вели дека не сакаат да бидат жртви на системот, а воедно потврдува дека не се поврзани со ниту една политичка партија. Додава дека дел од нив имаат оформено семејства и вработувањето им е особено важно. 

„Ние сакаме да им помогнеме на нашите колеги кои секојдневно се соочуваат со дефицит на работен кадар и се растргнати на сите страни. Бараме можност да се докажеме и покажеме. Можност од која не дели само еден потпис на нашите договори за вработување, како и можност за стабилна егзистенција“ - вели Коларовски.

Кажа дека денеска биле примени од министерот за внатрешни работи, Агим Нухиу кој ги известил дека на 10 октомври 2016 година било доставено барање до Министерството за финансии, но добиле одговор дека е потребно доставување на уште едно во 2017 година. Нухиу им ветил на кандидатите дека по новогодишните празници од МВР ќе испратат повторно барање до Министерството за финансии.