KAРАНТИНОТ ГО СЛАБЕЕ ИМУНИТЕТОТ: На постарите и на децата им треба движење

Добивај вести на Viber

Лекарите се согласни дека карантинот влијае на психо-физичката состојба на луѓето, а движењето и физичката активност им се најпотребни на постарите и на децата.

Дополнително, ограниченото движење поради коронавирусот во изминатиот период придонесе луѓето да бидат под стрес, со што слабее имунитетот.

„Секако дека целата ситуација влијае на организмот на секој човек. Физичка активност и движење им требаат на сите болни, но и на здравите луѓе. Периодов повеќето луѓе беа под стрес. Нормално дека пешачењето и чистиот воздух добро ќе им дојде на сите“, вели општ лекар.

Феризад Хаџиреџа, педијатар од Дебар вели дека на децата им се потребни прошетки во природа, но истото треба да го практикуваат и постарите кои се хронично болни, страдаат од срцеви болести, дијабетес и слично.

„Стресот си влијае на имунитетот, иако децата се мали и не ја разбираат целата ситуација, додека постарите чувствуваа страв, се плашеа дали некој е заразен или не. Децата во овој период не се мешаат многу, училиштата и градинките не работат, но родителите ги носат на езерото за да ги прошетаат. Бројот на пациенти е намален, така што во ординација доаѓаат по 15-20 пациенти дневно, а претходно доаѓаа по 40-60“, рече Хаџиреџа.

Од 18 март Македонија е во вонредна состојба и таа ќе трае до 30 мај.

Уставен суд деновиве времено ја „замрзна“ мерката за ограничување на движењето за малолетни лица и пензионери. 

Судот ја „замрзна“ Уредбата на Владата за двете категории на граѓани кои ќе може да се движат како и останатите од 5 часот наутро до 19 попладне. За лицата до 18 години досега беше дозволено движење од 12 до 19 часот, а за лицата над 67 години од 5 до 12 часот.

Образложението од Уставниот суд е дека мнозинството на судии сметаа дека мерката е дискриминаторска за двете категории на граѓани.