КХВ испитува дали имал некој инсајдерски информации за „Тетекс“
Објавено во: Економија 11 Февруари, 2020
Комисијата за хартии од вредност дополнително ќе соопшти имал ли Тито Беличанец, инсајдерски информации кога пред десет дена ги продаде своите 4.000 акции со право на глас во АД Тетекс. Беличанец е член на УО на компанијата од каде вчера соопштија дека го затвораат погонот за производство на тешка конфекција. Од КХВ за Фактор велат дека тие како регулатор вршат редовни контроли.
„Комисијата врши проактивна супервизија и надзор на пазарот на капитал и тоа секојдневно во реално време преку on-line контрола на БЕСТсистемот, контрола на процесот на утврдување и порамнување на склучените трансакции, како и евентуални забранети дејствија при работа со хартии од вредност, вклучувајќи го и друштвото кое е предмет на ваш интерес. КХВ во рамките на своите надлежности ги презема потребните активности, но во интерес на постапката која е во тек, не смее да објавува било какви информации, стои во одговорот од Комисијата за хартии од вредност.
Од „Тетекс“ вчера соопштија дека го затвораат погонот, а денеска генералниот директор Глигорие Гоговски во разговор за Фактор рече дека компанијата ќе продолжи со работа. Генерално другите дејности во континуитет носеле поголеми приходи.
А.Т.