„КИДНАПИРАНА Е, НЕМА ШТО ДРУГО ДА БИДЕ“: Зборовите на таткото Александар, вака сведочеше мајката на Вања

Добивај вести на Viber

Зорица Ѓорчевска, мајката на убиената Вања, во своето сведочење го опиша денот кога нејзината ќерка исчезна, нагласувајќи дека Александар, нејзиниот поранешен сопруг, веднаш тврдел дека Вања е киднапирана.

Според нејзините зборови, тој рекол: „Нема што друго да биде.“

Според сведочењето на Зорица, Вања на 27 ноември утрото во 7.20 часот излегла од дома за на училиште, а таа, по добиена порака од класната, веднаш сфатила дека нешто не е во ред. Се обидела да ја контактира Вања на мобилен, но не добила одговор. Следејќи ја локацијата на мобилниот телефон преку Гугл, таа и Александар заминале до една напуштена куќа на булеварот Партизански одреди, но не пронашле ништо. Веднаш потоа пријавила во полиција и започнала потрагата.

Александар, кој брзо пристигнал по повикот на Зорица, бил, како што таа опиша, потиштен и тажен додека ја барале Вања.

„Не е вообичаено тој толку брзо да се подготвува. Обично доцнеше, но овој пат беше спремен,“ сведочеше таа. Иако Александар бил во контакт со инспектори и се ангажирал во потрагата, однесувањето му било невообичаено тивко и повлечено.

Зорица детално ја опиша потрагата по нејзината ќерка, во која учествувале роднини, пријатели, па дури и соседи кои доброволно давале снимки од безбедносните камери во околината.

„Го прегледувавме секој чекор на камерите, но Вања не се појави“, изјави таа.

Во својот исказ, таа исто така раскажа за нејзините имотни односи со Александар, откривајќи дека по нивниот развод, станот што го делеле останал во нејзина сопственост. И покрај нивните минати недоразбирања, Александар имал клуч од станот за да може да се грижи за децата.

На 3 декември, трагичната вест го промени сè. Зорица беше повикана во полициска станица каде што ѝ соопштија дека нејзината ќерка е пронајдена мртва. „Ме однесоа да ја идентификувам“, раскажа мајката на Вања.

Случајот за исчезнувањето и убиството на Вања ја потресе цела Македонија и регионот воопшто, оставајќи неизбришлив белег врз сите кои учествуваа во потрагата.

Во судот денеска се присутни обвинетите Љупчо Палевски, Боре Видевски, Велибор Манев и Влатко Кешишов, како и таткото на девојчето, Александар Ѓорчевски.

Обвинетите на изминатото рочиште пред Судот се произнесоа дека не се чувствуваат за виновни за што дополнително нивната одбрана ќе достави докази.

Според обвинението, тие заедно испланирале грабнување на 14-годишното девојче со цел да присилат член на нејзиното потесно семејство да даде парични средства за откуп.

На 22.11.2023, обвинетиот заедно со уште тројца претходно обвинети заеднички извршиле грабнување на оштетениот Панче Жежовски во Велес, со намера да го присилат да им го даде сопственото возило „Цитроен“ за да го користат за грабнување на детето во Скопје.

Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.

Во врска со овој случај е осомничено уште едно лице за помагање по извршување на кривичното дело против кого постапката ќе се води одвоено.

Судењето го води судијата Ивица Стефановски, а застапник на обвинението е обвинителката Жаклина Крстевска.