НОВИ ДОЗИ ВАКЦИНИ ПРОТИВ КОВИД ПРИСТИГНАА, НО СКЕПТИЦИЗМОТ РАСТЕ: „Уште едно вакцинирање нема смисла“

Добивај вести на Viber

Пред нас е сезоната на есенските вируси, време кога респираторните инфекции значително се зголемуваат, а имунолошкиот систем на луѓето е изложен на дополнителен притисок. Со искуствата од корона пандемијата, надлежните ценат дека сега е вистинскиот момент за поврорна превенција и заштита. Минатата недела пристигнаа нови дози вакцини против ковид-19, со што се обезбедува дополнителна можност за граѓаните да се заштитат од евентуалните нови бранови на вирусот.

Министерството за здравство информирашедека се пристигнати 11.520 дози од вакцината, кои во текот на неделава ќе бидат дистрибуирани до здравствените домови низ земјата. Во Скопје, вакцинацијата ќе се одвива во поликлиниката Бит Пазар. Вакцините се наменети за возрасни и адолесценти над 12 години, а надлежните потсетуваат дека вакцинацијата останува најефикасната мерка за заштита на јавното здравје од ковид-19 и други респираторни заболувања​

Некои велат нема смисла, други ја поддржуваат вакцинацијата против Ковид-19

Во пресрет на новата сезона на вируси, граѓаните сè уште се соочуваат со прашања дали е потребно повторно да се вакцинираат, што е особено важно со оглед на постојаните предизвици од нови варијанти на вирусот.

Дел од нив се убедени дека повторната вакцинација е неопходна за лична заштита и колективно здравје, додека други сметаат дека веќе нема смисла да се вакцинираат поради искуствата од претходните бранови на пандемијата.

„Примив две дози и бустер во најтешкиот период на пандемијата, иако кога се заразив со ковид, не поминав баш лесно. Не гледам причина зошто повторно би требало да се вакцинирам. Немав полесни симптоми и покрај трите примени вакцини,“ вели 45-годишната скопјанка, Мира Т. која повеќе не е убедена дека нова доза ќе направи разлика.

Слично размислува и 50-годишниот Борис С. Кој исто така, како што посочува, извојувал тешка битка со Ковид-19.

 „После три вакцини и кога сè уште тешко поминав со вирусот, не гледам смисла да продолжам да се вакцинирам. Цела недела бев хоспитализиран, како воопшто да не сум рпимил вакцини. Верувам дека во мојот случај, имунитетот некако веќе е стекнат.“

Сепак, некои граѓани ја поддржуваат идејата за редовна вакцинација, особено повозрасните. „Јас редовно се вакцинирам против грип, и истото ќе го направам и со вакцината против ковид. Мислам дека е добро секоја година да се прима вакцина, слично како со грипот,“ вели 73-годишниот Ѓорѓи П., кој планира да ја прими вакцината оваа есен.

Се чини дека новиот бран на вакцинирање ќе биде проследен со поделени мислења, но факт е дека секој граѓанин ја има можноста повторно да ја заштити својата здравствена состојба, без разлика на личниот став.

Голем број вакцини против ковид-19 уништени поради истечен рок

Во текот на 2023 и 2024 година, голем број вакцини против ковид-19 беа уништени во Македонија поради истек на рокот. Во 2023 година, значителен дел од вакцините беа уништени, бидејќи беа нарачани во поголеми количини од потребното, а многу од нив останаа неискористени поради намалениот интерес за вакцинација. Исто така, во 2021 година беа уништени 13.000 дози вакцини од донацијата од Бугарија, кои имаа краток рок и не беа искористени навреме.

Во 2024 година, властите сè уште располагаат со околу 50.000 дози вакцини против ковид-19, кои остануваат достапни за граѓаните, но интересот за вакцинација продолжува да опаѓа​

Македонија далеку од целта: Вакцинирани само 40% од населението, колективен имунитет сè уште недостижен

Во Македонија, според последните достапни податоци од септември 2024 година, бројот на вакцинирани граѓани против COVID-19 останува далеку под глобалниот просек. Приближно 48% од населението примило барем една доза од вакцината, додека целосно вакцинирани се околу 40%. Овие бројки се далеку под посакуваниот опфат од 95%, кој е неопходен за да се постигне колективен имунитет и целосна заштита на населението. Вакцинацијата главно се врши во здравствените домови и центрите за јавно здравје, со дополнителни пунктови формирани по потреба​

Зголемување на реинфекциите е забележано во август и септември, а најмногу нови случаи се регистрирани кај лица над 60 години. Оваа група е најподложна на сериозни последици доколку не се вакцинирани, што дополнително го нагласува значењето на вакцинацијата, особено кај повозрасните и хронично болните.

Анита Буховски