Ќе се доделуваат 20 стипендии за додипломски студии во Унгарија

Добивај вести на Viber

Конкурс за доделување 20 целосни стипендии за македонски државјани за додипломски студии од областа на инженерските и земјоделските науки во Унгарија е објавен од страна на Министерството за образование и наука.

Конкурсот е во согласност со потпишаната „Работна програма за образовна и научна соработка помеѓу Република Македонија и Република Унгарија“, во рамките на програмата „Stipendium Hungaricum“, која е основана од унгарската Влада во 2013 година.

Унгарија преку Одборот за стипендии на унгарскиот институт Balassi нуди стипендии за странски државјани заинтересирани за додипломски, постдипломски или докторски студии во акредитирани високообразовни институции во Унгарија за општествени или технички науки.

За прием на избраната виоскообразовна институција се полага приемен испит. Доколку наставата се реализира на странски јазик, кандидатот треба да го знае дадениот јазик на нивото потребно од страна на домашниот институт. Доколку наставата се реализира на унгарски јазик, кандидатите ќе учествуваат во подготвителна настава во период од една година обезбедена од страна на Balassi Институтот пред да започнат со своите студии.

Потребни документи за аплицирање се: Формулар за аплицирање, кратка биографија, писмо за изразување на интерес, сертификат за познавање на англиски јазик, доказ за завршен степен на образование, копија од пасош, лекарско уверение и лична изјава. Заинтересираните кандидати апликацијата за стипендија и потребните документи треба да ги достават до  Министерството за образование и наука на адреса ул. Св. Кирил и Методиј  бр.54, 1000 Скопје.

Апликацијата за стипендија може да се преземе на веб страната на Министерството за образование и наука. Рокот за поднесување на апликации е 19.3.2014 година.

Сите дополнителни информации се достапни на веб страната http://www.scholarship.hu/Englishsite/tabid/184/language/en-EN/Default.aspx.