ЌЕ СЕ СПРАВУВА СО „ДОМАШНИТЕ ТЕРОРИСТИ“: Трамп испрати војска во Портланд, Орегон

Добивај вести на Viber

Американскиот претседател Доналд Трамп изјави денеска дека ќе испрати војници во градот Портланд, во американската сојузна држава Орегон, за да се справат со „домашните терористи“, проширувајќи го контроверзното распоредување на војници во американските градови, јавија светските агенции.

Трамп напиша на социјалните мрежи дека му наредил на Министерството за одбрана да „обезбеди сите потребни војници за да го заштити Портланд, кој е разорен од војната“. „Исто така, дозволувам употреба на сила, доколку е потребно“, рече Трамп.

Тој истакна дека овој потег е неопходен за да се заштитат објектите на американската служба за имиграција и царина, кои ги опиша како „под опсада од напади од Антифа и други домашни терористи“.

По убиството на конзервативниот активист Чарли Кирк, републиканскиот претседател ги засили напорите за справување со „радикалната левица“, која ја обвинува за проблемите во земјата со политичкото насилство, јавуваат агенциите.

Порано во септември, Трамп ја опиша ситуацијата во Портланд како „живеење во пекол“ и рече дека размислува да испрати федерални војници, како што неодамна се закани дека ќе го направи, за да се справува со криминалот во други градови, вклучувајќи ги Чикаго и Балтимор.

Во текот на летото, тој распореди единици на Националната гарда во Лос Анџелес како дел од преземањето на контролата врз спроведувањето на законот во округот Колумбија.

Најголемиот град во Тенеси, Мемфис, се подготвува да распореди трупи на Националната гарда, а републиканскиот гувернер Бил Ли вчера изјави дека тие ќе бидат дел од зголемувањето на ресурсите за борба против криминалот во градот.