Ќе се рестартираат мешовитите комисии со Грција и Бугарија, но и исплатата на дебелите хонорари за членовите

Добивај вести на Viber

Билатералните експерстки комисии кои се формирани согласно со Преспанскиот и со Договорот за добрососедство седум месеци не ги добиле своите месечни хонорари кои се движат од 61.500 денари до 73.800 денари по застојот поради корона-кризата и предвремените парламентарни избори во земјава.

„Фактор“ не доби навремена информација зошто во меѓувреме заостанатите хонорари не се исплатени и кога ќе продолжи нивната исплата? Дополнително, дали постои рок, односно договор до кога би се исплаќале во иднина овие хонорари? 

Единственото објаснување може да се најде единствено во точката од владина седница дека „се разгледувала исплата на заостанати хонорари и исплата на хонорари до крајот на фискалната 2020 година, на координаторите и на членовите на комисиите кои произлегуваат од превземените обврски од потпишаните билатералните договори со Република Бугарија и Република Грција, формирани со Решенија на Владата на Република Северна Македонија“.

Останува нејасно дали има спор за исплата на овие хонорари меѓу Владата и членовите на трите билатерални комисии - Заедничкиот интердисциплинарен комитет на експерти за историски, археолошки и образовни прашања со Грција; на Меѓународната група на експерти за имиња за комерцијална намена, трговски марки и заштитни знаци со Грција, како и на Заедничката мултидисциплинарна експертска Комисија за историски и образовни прашања со Бугарија.

Според податоците до кој дојде „Фактор“ од „Отворени финансии“ на координаторите Виктор Габер, Драги Ѓорѓиев, како и на Александар Литовски им биле исплаќани од 73.700 до 73.830 денари редовно секој месец од Министерството за надворешни работи, но до март 2020. Истото се однесува и на останатите членови:

Неда Здравева, Ѓорѓи Филипов, Арта Билали Зендели, Јадранка Дабовиќ Анастасовска, Валентин Пепељугоски се исплаќани со по 62.000 денари. Ана Чупеска-Станишковска, Фахри Рамадани, Никос Чаусидис, Далибор Јовановски, Људмил Спасов добивале по 61.525. Љупчо Ристески, Дарко Стојанов, Петар Тодоров, Љубица Спасковска и Ванчо Ѓорѓиев „инкасирале“ по 61.495 месечно.

Во меѓувреме се подготвува повторно рестартирање на комисиите, особено по притисокот што доаѓа од Бугарија, неодамнешната посета на премиерот Зоран Заев во Атина, како и најавениот датум за почетокот на преговорите со ЕУ кон крајот на годината. Министерот за надворешни работи Бујар Османи има најавена петочна средба со шефицата на бугарската дипломатија, Екатерина Захариева.

Во понеделникот од кабинетот на премиерот Заев објавија дека остварил средба со членовите на македонскиот дел на Интердисциплинарниот комитет за историски, археолошки и образовни прашања формиран меѓу Северна Македонија и Грција согласно Договорот од Преспа. Според соопштението, на средбата било констатирано дека е постигнато ниво на конструктивна соработка во Комитетот во рамки на одредбите од Договорот од Преспа.

А.К.