Ќе влијаат ли преговорите со Грција на туризмот?
Објавено во: Македонија, Балкан 08 Април, 2018
Григорис Тасиос, претседателот на грчката Федерација на хотелиери и претседател на Сојузот на хотелиери од Халкидики вели дека разговорите за името и раздвижувањето во преговорите меѓу Скопје и Атина не влијаат на туризмот и туристичкиот бран од Македонија кон Грција.
„Мислам дека е многу јасно, со години назад дека политиката нема никаква врска со туризмот, не влијае негативно на туристичките бранови од Грција кон Скопје. Очекуваме и ние да видиме каква ќе биде разврската во преговорите меѓу владите, меѓу владата на нашата земја и владата од Скопје“ – коментира Тасиос.
На прашањето дали евентуалниот договор би влијаел позитивно на туризмот, вели дека трговските односи се добри, и едното не е поврзано со другото, па така тој лично, не очекува некакви особени промени по постигнувањето решение.
Во разговор со дописничката на МИА од Атина, тој ги анализира туристичките односи меѓу двете земји, но ги пренесува и очекувањата за посетеноста на Халкидики, за Велигден, први мај, но и летната сезона.