Коѕијас: Референдумот не е услов, туку избор на Скопје

Добивај вести на Viber

Грчкиот министер за надворешни работи, Никос Коѕијас во интервју за грчката државна телевизија ЕРТ, коментирајќи го и објаснувајќи го резултатот од референдумот во Македонија вели дека референдумот не е ниту услов, ниту правно барање за имплементација на Договорот од Преспа, туку е избор на Скопје. 

Коѕијас истакна дека Ѓорѓе Иванов за претседател и Зоран Заев за премиер биле избрани со помал број гласови од гласовите што ги доби „ЗА“ на референдумот.

„Сега одиме на политичкиот дел. Голем процент е 37 -38 отсто? На прв поглед кога некој го гледа, ако не ги знае балканска политика и политиката на Скопје и нивната реалност, ќе каже дека е мал. И логично е. Но, ако знае колку гласови се овие 37-38 отсто и што се случи на претходните избори, тогаш ќе сфати одредени работи“- вели Коѕијас. 

Како што јави дописничката на МИА од Атина, министерот за надворешни работи на Грција, во синоќешното опширно интервју за грчката државна телевизија објасни дека не се пречистени изборните списоци и дека ако гласале сите што имаат право на глас според реалното избирачко тело од еден до 1,2 милион гласачи, мнозинството од 50 отсто +1 ќе беше под 600.000, односно 540.000-550.000.

„Реалното избирачко тело е околу милион, 1.100.000 до 1,2 милион. Во ова реално тело „ДА“ за Договорот од Преспа доби над 50 отсто. Односно и да гласаше целото избирачко тело, резултатот пак ќе беше над 50 отсто“- вели Коѕијас, пренесе МИА.

Според информациите што официјална Атина ги имала од Скопје, како што рече Коѕијас, проценките биле дека излезеноста ќе биде меѓу 40 и 45 отсто, а според тоа Грција била ориентирана дека ќе гласаат 40-41-42 отсто.

Во однос на случувањата кај нас, шефот на грчката дипломатија рече дека ако Заев не ја добие битката во Собранието, според негово мислење, „ во секој случај ќе ги добие следните избори, тоа го велат резултатите од референдумот“.