Кои телевии имаат балансирани, а кои пропагандистички вести?

Добивај вести на Viber

Надзорот на телевизиските вести спроведен од септември 2016 до февруари 2017 година покажа дека во медиумскиот простор постојат четири комерцијални телевизии кои можат да се наречат пропагандистички, е заклучокот од вчерашната конференција организирана од страна на Институтот за комуникациски студии (ИКС) – пренесува Мета.

– Станува збор за телевизиите „Сител“, „Канал 5“, „Алфа“ и „ТВ Нова“, чии вести во целиот период на надгледување биле помалку или повеќе фаворизирачки кон партијата ВМРО-ДПМНЕ, а со негативен или често демонизирачки став кон политиките на опозицискиот СДСМ – рече Игор Мицевски, презентирајќи ги заклучоците од надзорот спроведен во рамките на проектот МОДЕМ, поддржан од Холандската амбасада.

Наспроти ова, во вестите на телевизиите „24 Вести“, „Телма“, „Алсат М“ и „ТВ 21“, од кои последните две емитуваат двојазично, надзорот покажал дека постои избалансираност, незаземање страна, почитување на јавниот интерес или дека критичката опсервација кон едната или другата партија биле сеопфатно аргументирани, со изнесување на повеќе страни.

Амбасадорот на Кралството Холандија во Македонија, Ваутер Пломп, изразувајќи задоволството од проектот, изјави дека јавноста мора да е свесна за големиот импакт на медиумите, вклучувајќи ги и социјалните, особено во ширењето говор на омраза и навредлив говор.

Според Пломп, таквиот тип на говор не е она што се нарекува постоење на плурализам во медиумите и слобода на изразување.

На конференцијата свои излагања имаа и Марина Тунева од Советот за етика во медиумите во Македонија, Зоран Трајчевски, директор на Агенцијата за медиуми, Жан Франсоа Фурнемон, експерт за медиумска политика, како и новинарите Санта Аргирова и Шќељзен Акифи, а дебатата ја водеше, Снежана Трпевска, истражувач од ИКС.