Кој е Костадин Костадинов? Влезе на мала врата во Собранието, а стана најистакнат во СДСМ
Објавено во: Македонија 31 Октомври, 2018
Младиот струмичанец Костадин Костадинов за една година успеа да се пробие од пратеник кој влезе на мала врата во Собранието до најекспониран народен избраник од редовите на СДСМ по доделувањето на обврската да биде портпарол на партијата.
Костадинов не стана пратеник со редовните парламентарни избори во декември 2016-та, туку требаше да чека до првиот круг од локалните избори есента 2017-та. Тогаш неколку пратеници станаа градоначалници и се ослободи простор за група од петтемина кои чекаа следни на листата, меѓу кои беше и Костадинов. Во прилог на тоа одеше и тоа што изминатата пролет по половина година премиерот Зоран Заев конечно доби мандат да состави Влада и неколку пратеници преминаа во извршната власт.
До скоро беше претседател на Локалниот клуб на струмичките социјалдемократи. Девет години по ред беше дел од раководството на ЛК СДММ.
Во последно време редовно даваше изјави за медиумите, по што можеше да се заклучи дека ќе му следува и функцијата портпарол. Често е на собраниската говорница, гостува во телевизиски емисии и држи прес-конференции.
Постојано ја критикува опозицијата, а пред се Христијан Мицкоски, Никола Груевски и Ѓорѓе Иванов. Пред еден месец имаше и „портпаролски дуел“ со Наум Стоилковски од ВМРО-ДПМНЕ. Откако Стоилковски „му упадна“ со прашања за време на еден брифинг со новинарите, дебатата се пресели во студиото на Канал 5 во емисијата „Само Вистина“.