Кој не сака да биде директор?! 550 лица аплицирале за 99 места!

Добивај вести на Viber

Владиниот портпарол Александар Ѓорѓиев денеска соопшти дека колу 550 лица конкурирале на вториот јавен повик на Владата за вработување  на директорски позиции.

Како што соопштуваат од владата, ако се земе во предвид дека едно лице конкурирало за повеќе позиции, тогаш бројката на поднесени апликации изнесува околу 700.

Со  вториот јавен повик беа опфатени 99 раководни функции, од кои 40-тина за централно ниво, а останатите за подрачни единици на државните институции.

„Најинтересни позиции, според податоците, се секторски директор во МЕПСО за која конкурирале 36 лица и организаторски директор на клиниките, каде што во просек конкурирале по 25 до 35 лица“ –рече Ѓорѓиев.

Приближно толку кандидати се пријавиле и за секторски директор за финансии и секторски директор за сметководство и трезор во Фондот за здравствено осигурување, како и за медицински директор на универзитетските клиники.

„Добар интерес, согласно очекувањата, е покажан и за позициите директор на Јавното претпријатие за државни патишта и за директор на Државниот инспекторат за градежништво и урбанизам, за позицијата член на Управен одбор во МЕПСО, за М-НАВ и други позиции“-  рече Ѓорѓиев.

Неочекувано, голем интерес имало  и за раководните позиции на подрачни единици - за тие на Јавното претпријатие „Македонски шуми“, за подрачни единици на Министерството за земјоделство, шумарство и водостопанство, на Управата за имотно правни работи, на Управата за матична евиденција, како и за подрачните единици на Агенцијата за вработување. За овие позиции конкурирале во просек по 10-20 лица.

Од Владата велат дека селекцијата за првиот јавен повик е веќе направена и оние кои влегле во потесен круг, ќе бидат повикани на интервјуа.