Кој сè се бори во украинскиот конфликт?

Добивај вести на Viber

Срби, Французи, Шпанци, Чеченци, Швеѓани - конфликтот во Украина собра многу странци кои се борат од двете страни. Некои се борат како платеници, а други заради идеали, објави Би-Би-Си. Според британскиот сервис, бројот на овие борци кои од различни земји пристигнале да се борат во Украина е поголем дури и од оној на руските борци кои во моментот се наоѓаат таму. Странските доброволци се мотивирани од причини кои допираат до конфликтот во поранешна Југославија или дури и Шпанската граѓанска војна од 30-тите години на минатиот век. Проруските активисти ги претставуваат своите странски доброволци како припадници на „модерни меѓународни антифашистички бригади“, додека во Киев се води отворена дебата за формирање на „странски легии“ на украинска страна. Податоците на проруските бунтовници велат дека од почетокот на конфликтот меѓу три и четири илјади руски доброволци сами се упатиле кон Украина за да им помогнат на сепаратистите. За Чеченците се верува дека се борат на двете страни, но оти многу повеќе ги има на страната на Киев. На двете страни од конфликтот се наоѓаат и околу 20 француски доброволци, од кои четворица се борат на страната на проруските активисти затоа што веруваат дека Русија е последното упориште против глобализацијата кое треба да се брани. Останатите, пак, се борат во украинската доброволна единица Азов позната по крајно десничарските ставови на спротивната страна. Двајца припадници на шпанската левица се борат исто така на страната на проруските бунтовници, во знак на благодарност за ставовите и поддршката на Русија за републиканците во Шпанската граѓанска војна. Затоа тие сметаат дека возвраќаат „историска услуга“. Во украинскиот конфликт се верува дека учествуваат и повеќе десетици Срби, од кои најголемиот број на страната на проруските сепаратисти, но има и такви кои платеници војуваат како дел на украинската војска. Според Би-Би-Си, во судирите на Украина се борат и помал број на граѓани на Грузија, Белорусија, балтичките земји, Хрватска, Финска, Норвешка, Канада, Словенија и Чешка.