Коњите и кочијашот на принуден одмор, се чека нова траса за скопскиот пајтон

Добивај вести на Viber

Коњите се на принуден одмор, а скопскиот пајтон не вози низ градот веќе две седмици. Причина за ова, како што пишува Вечер е  поради продолжување на трасата по која ќе сообраќаат коњите, бидејќи претходно пајтонот вртеше круг само околу плоштад и улица Македонија, а сега треба да продолжи и кон улицата Кеј 13 Ноември кај баровите. Од ЈП „Улици и патишта" сега задолжени да направат корекции на новата траса по која ќе се движи кочијата, бидејќи на некои делови асфалтот бил оштетен. Истовремено, се работи и на обележување на продолжената траса на пајтонот. „Кочијата тргнува од Зоолошката, каде што и е седиштето, оди покрај стадионот кај Опатија, низ паркчето по кејот кај вртелешката и баровите, потоа врти кај Холидеј ин и под ГТЦ кај автобусите, потоа во Жена-парк, под Порта Македонија, плоштадот, улица Македонија и врти повторно кај Лондон кафе. Повеќе од еден километар е зголемена трасата, а средена е и делницата која беше оштетена. Поправките се направени, останува уште еден дел да се обележи и очекуваме уште наредната недела пајтонот да се врати на улица“, велат од "Улици и патишта". Засега нема информации дали зголемувањето на трасата ќе значи и зголемување на цената за возење со пајтонот. Досега возење низ центарот чинеше 100 денари за возрасни и 50 денари за деца. Пајтонот треба да сообраќа секој ден освен понеделник и тоа наутро од 10 до 13 часот и попладне од 16 до 21 часот, а се очекува да биде голема туристичка атракција за странските и домашните туристи, додава Вечер.