Ковачев вели дека трите документи од францускиот предлог даваат одговор дали е Македонија подготвена за преговори
Објавено во: Македонија 22 Јуни, 2022
Бугарскиот европратеник Aндреј Ковачев за БГНЕС изјави дека треба да го прецизираат протоколот и да ги релаксираат односите со Македонија.
Тој за БГНЕС говори за трите документи кои ги содржи францускиот предлог. Вели дека тие само во комплет даваат одговор на прашањето дали Македонија е подготвена да започне преговори за членство во ЕУ.
„Првиот документ, нацрт-заклучоците на Советот ни кажува дека темата ‘билатералните односи Скопје-Софија’ ќе биде дел од преговарачкиот процес, а тоа е многу добро за Бугарија. Овој документ, како и вториот документ, преговарачката рамка, се однесуваат на трет, клучен документ – билатерален протокол, во кој нема ништо француско и е целосно производ на договор меѓу министерствата за надворешни работи на двете земји. Ова е всушност патоказ со конкретни заложби и чекори кои Скопје мора да ги исполни како возврат да го укинаме ветото“, вели Ковачев во изјавата за БГНЕС.
Понатаму, тој вели дека колку што знае, веќе има нацрт билатерален протокол подготвен од МНР и испратен во Скопје.
„Да не се залажуваме, овие историски теми се основата на недоразбирањето меѓу двете земји и говорот на омраза кон Бугарите и Бугарија во Македонија“, рече Ковачев.Во меѓувреме, пратениците во бугарското Собрание изгласаа недоверба на премиерот Кирил Петков.