Ковид-пасошите не смеат да дискриминираат, вели Сијарто

Ковид-пасошите не смеат да дискриминираат, треба да се почитуваат сите вакцини, вели унгарскиот министер за надворешни работи Петер Сијарто. Тој потврди дека Унгарија се спротивставува на ставот на ЕУ дека треба да бидат прифатливи само вакцините одобрени од Европската агенција за лекови (ЕМА). 

Вели дека ковид-пасошите треба да ги почитуваат сите вакцини, вклучително и оние одобрени на национално ниво. Сијарто истакна дека постојат два начина на одобрување на вакцините за употреба во ЕУ - едниот е дозвола од ЕМА, а другиот е дека, во ситуација како што е пандемија, вакцината е одобрена од национален регулатор и дека во тој контекст луѓето не можат да бидат дискриминирани со ковид- пасоши.

Европската комисија објави дека во среда, 17 март, ќе претстави законодавен предлог за дигитални зелени пасоши, што граѓаните на ЕУ ќе можат да ги користат за да докажат дека имаат негативен тест, да имаат докази за присуство на антитела или дека биле вакцинирани со една од вакцините одобрени од Европската агенција за лекови.

Овој предлог на Комисијата ќе треба да биде потврден од Европскиот парламент и земјите-членки на ЕУ, а идејата е да се направи функционален на територијата на ЕУ пред празниците.