Кравјото лудило се врати во Романија, има ли опасност за Македонија?

Добивај вести на Viber

Кравјо лудило е потврдено кај говедско месо од Романија испратено на анализа во лаборатории во Велика Британија. Постои сомнеж дека заразената стока дошла од фарма во селото Деусу или од фарма во Клуж. Болеста била утврдена при редовна контрола во кланица, а позитивното животно било издвоено од синџирот на исхрана и нештетно отстрането. Заради ваквите резултати, Русија експресно го забрани увозот на жива стока, говедско месо и преработки од Романија. Романија уверува дека се придржува до европските процедури и оти нема да дозволи натамошно ширење на болеста. Оваа земја извезува милион грла стока годишно, а главно во Холандија, Италија и Хрватска. Според институциите за безбедност на храна во Македонија, за земјава нема опасност. Речиси незначителна е трговската размена на Македонија со Романија од 1 јануари годинава до денес во однос на говедско месо и производи од месо од говеда, соопшти Агенцијата за храна и ветеринарство (АХВ) по информацијата за појава на „кравјо лудило“ или спонгиоформна енцефалопатија кај говедата во Романија. Во овој период се увезени вкупно 13.561 килограми говедско месо и тоа пред 1 мај 2014. Пратките се пропратени со ветеринарно здравствен сертификат издаден од надлежните служби на Република Романија. Агенцијата, како што наведува, ја следи состојбата со болеста преку известувањата на Светската организација за здравствена заштита на животните и доколку постои и најмал ризик по здравјето на граѓаните, ќе преземе соодветни мерки.