Кривичен се правда: „Пуч“ не се одложува поради поротниците

Добивај вести на Viber

Основниот суд Скопје 1 Скопје по одложувањето на денешната главна расправа за случајот „Пуч“ во соопштение наведува дека досега за овој предмет биле закажани 10 главни расправи, од кои шест биле одложени бидејќи обвинетите биле на службени патувања, три расправи биле одложени по барање на СЈО, а само минатата расправа била одложена заради болест на еден од судиите – поротници.

„Со цел да не дојде до одредени манипулации ја потсетуваме јавноста дека по конкретниот предмет беа одржани 10 главни расправи од кои шест беа одложени бидејќи обвинетите постојано беа на службени патувања, потоа три расправи беа одложени по барање на Јавното обвинителство за гонење кривични дела поврзани и кои произлегуваат од незаконското следење на комуникациите (СЈО), од кои една расправа заради приватна прослава на обвинителката Јанева, а само минатата расправа беше одложена заради болест на еден од судиите – поротници, нешто што не може да се предвиди. Оттаму нејасно е како Судот го одолговлекува предметот повеќе од една година, како што обвинуваат странките“, реагираат од Кривичен суд.

Оттаму посочуваат дека главната расправа за „Пуч“ денеска е одложена откако претседателот на судечкиот совет, надлежен да постапува по овој предмет, пред присутните констатирал дека еден од судиите – поротници, по неговото лично барање бил разрешен од советот, а со одлука на претседателот на Судот, по барање на претседателот на советот, назначен е нов судија – поротник, како и дополнителен судија – поротник, за кои и покрај барањата и ургнециите за итност, испратени од претседателот на Судот, се уште не се доставени безбедносни сертификати за постапување и увид во класифицирани информации и податоци, кои се неопходни за новоназначените судии – поротници да постапуваат по конкретниот предмет.

„За сето тоа на денешната главна расправа, во присуство на јавноста беа известени странките во постапката, како и присутните претставници на медиумите, а главната расправа беше одложена на неопределно време, односно се додека неопходните сертификати не бидат доставени до Судот“, пишува во соопштението од Кривичниот суд.