Кривичен суд денес одлучува за Морина, Македонија помеѓу два огна

Добивај вести на Viber

Кривичниот суд денеска ќе одлучува за екстрадицијата што ја бара Србија преку Интерпол на поранешниот член на ОВК; Томор Морина, како обвинет за воени злосторства над цивилно население. Тој беше уапсен во Македонија на Блаце пред повеќе од една недела, а во меѓувреме и Косово и Србија се заканија со нарушување на односите во зависност од тоа како ќе се постапи со притворениот.

Македонија е потписник на Европската конвенција за екстрадиција, а по пристигнатото барање од Белград за негова екстрадиција, денеска ќе одлучува Судот. Во меѓувреме, функционери од албанските партии во земјава, меѓу кои и вицепремиерот Бујар Османи, отворено побараа негово ослободување.

Османи побара од Кривичниот суд да му дозволи да го посети Морина во притвор, но беше одбиен, а потоа рече дека нашол начин да му пренесе порака дека „нема шанси да биде екстрадиран“.

- Најважно е ни час повеќе да не се придонесува кон регионалната нестабилност, ваквите деструктивни појави го поткопуваат најважното нешто – а тоа е придонесот на Македонија кон помирувањето и трајниот мир во регионот – изјави Османи..

Кога Србија ќе добие одговор зависи од тоа дали документацијата е комплетна и дали судот ќе побара дополнителни информации. Конечната одлука за Морина ќе ја донесе Министерството за правда. Премиерот Заев одговарајќи на пратеничко прашање рече дека за овој случај важи меѓународното и домашното право.

- Владеењето на правото и почитувањето на меѓународни узанси и правила е норматив, европска вредност која и вие и јас и сите се залагаме. Потерницата е стигната од Интерпол, не е ниту од Вучиќ или Милошевиќ. Од Интерпол каде сме членка и каде сме гласале и Косово да биде членка, без разлика што Србија е против. Постапките ги води надлежен обвинител и за нив одлучува надлежен судија, ниту ги води Заев, ниту Спасовски, ниту Агим Нухиу, ниту кој било од Владата, рече Заев во Собранието.