Кумановската Брза помош засилена со уште едно возило за превоз на заразени со Ковид 19

Добивај вести на Viber

Од Здравствен дом Куманово велат дека овој период откако е во ек коронакризата, Брзата помош кадровски е засилена, а деновиве од Владата добиле уште едно возило, со што сега имаат две возила за транспорт на пациенти заразени со коронавирусот.

Директорот Фарук Алили вели дека приоритет имаат луѓето кои се инфицирани со коронавирус, но и сите други итни случаи како сообраќајни несреќи, инфаркти, пациенти со срцеви болести и други.

„Работата во Брзата помош се одвива тековно, но можам да кажам дека бројот на повици е намален. Имаме две екипи за во градот, и две екипи кои се за луѓето заразени со Ковид 19. Сите вработени имаат заштитна опрема. И оние пациенти кои се наоѓаат на инфективното одделение во кумановската болница се пренесуваат во Скопје со нашите возила, а истото се прави доколку од Скопје се пуштаат на домашно лекување. Брзата помош е задолжена за транспортот. Сите вработени имаат дозволи за движење додека трае полицискиот час“, вели Алили.

Тој додава дека бидејќи стоматолошките ординации не работат периодов, кај нив во Здравствениот дом има стоматолошка служба која дава услуги на граѓаните.

Во Куманово има 130 заболени од Ковид 19. Неколку луѓе починаа, а заразени се и здравствени работници.

Вчера почина повозрасно лице и родилка на возраст од 27 години. 

На 22 март почина 57 година жена како последица на комликации од коронавирусот.

Ова беше прв смртен случај во Македонија од Ковид 19.

Кај жената посмртно беше утврдено дека била заразена.

Починати има од Скопје, Тетово, Штип, Струга, Кочани.

Засилениот полициски час кој забранува движење за викендите, и движење од 16 до 5 часот следниот ден треба да придонесе за запирање на ширењето на епидемијата.