КУМАНОВСКИТЕ СЛИКИ АНТИРЕКЛАМА: Ќе пропадне ли туристичката сезона?

Добивај вести на Viber

Начинот на кој странските медиуми известуваа за конфликтот во Куманово придонесе сликата за земјава во светот да се наруши. Тоа пак ќе влијае и на инвестициските одлуки, но и на индивидуалните одлуки на странците дали воопшто да патуваат во земјава. Неколкуземји, односно нивните  министерства за надворешни работи (Бугарија, Франција, Холандија, Италија...) издадоа предупредувања воопшто да не се патува во Македонија,па дури и ако се оди за Грција, повторно да се избегнува Македонија, односно да биде заобиколена. Повеќе тури кои биле закажани, особено оние за Охрид веќе се откажуваат. Дали може нешто да се направи? Како што сега стојат работите времето е кусо, и тешко дека нешто во брзо време ќе ја смени перцепцијата кај странците. Советот на Агенцијата за промоција и поддршка на туризмот упати апел  да се презентира реално ситуацијата односно да не се предимензионираат состојбите. Можеби нешто би можела да помогне планираната кампања од Агенцијата за промоција и поддршка на туризмот, која ќе се направи во соседните држави. Тие бездруго се поблиску па очекување е дека нивните граѓани можат полесно да разберат дека ситуацијата не е толку лоша како што надвор се претставува.