Легализација на дивоградби: Тече рокот за геодетски елаборати, кој не побрза ќе биде на мака!

Добивај вести на Viber

Истекува рокот во кој граѓаните кои имаат поднесено барање за легализација на дивоградби, ќе мора да ја комплетираат целата документација. Останува уште една година, рок во кој сите што сакаат да легализираат некаков објект – ќе мора да ги имаат обезбедено геодетските елаборати, и сета останата потребна документација. По завршувањето на тој рок, јуни 2014 година, повеќе не ќе може да се легализираат дивоградби.    Најмногу барања за легализација на дивоизградени објекти има во Куманово, скопската општина Гази Баба и Прилеп. Според податоците, во изминатите две години, кога започна процесот на легализација на дивоградби поднесени се вкупно 344.410 барања за легализација. Од нив одбиени се 497, а уважени 42.947 барања и најголемиот дел од нив веќе ја имаат завршено целата постапка со впишување на имотот во Агенцијата за катастар, стекнувајќи се со сопственост. Сепак за најголемиот број од вкупно поднесените барања за легализација, односно за околу 230.000 барања постапката е прекината и се чека комплетирање на документацијата. „За предметите каде е прекината постапката, а кои се најбројни, беа направени законски измени, со цел да се забрза процесот. Постапката се прекинува во случаи каде доставената документација до општините не е комплетна и истите можат да продолжат со легализацијата само откако ќе се достават потребните документи. Со оглед дека надлежните констатираа дека лицата кои поднеле барања за легализација, најчесто доцнат со доставувањето на геодетските елаборати кои се составен дел на документацијата, а која согласно Законот е потребна за утврдување на фактичката состојба и комплетирање на постапката, беше направена законска измени, односно се даде конкретен рок од 18 месеци (сметајќи од денот на влегување во сила на Законот за изменување и дополнување на Законот за постапување со бесправно изградени објекти), во кој геодетските елаборати ќе мора да се достават. Крајниот рок за доставување  на геодетските елаборати во сите предмети каде недостасуваат е јуни 2014 година. “ Надлежните во континуитет апелираат до граѓани кои поднеле барање да ја комплетираат својата документација, односно оние кои не доставиле геодетски елаборати истите да ги достават, со цел побрзо решавање на нивните предмети. Но, остри пораки се упатуваат и до  општините да го имплементираат овој процес и навремено да постапуваат по комплетираните барања, за да може процесот на утврдување правен статус за бесправните објекти што поскоро да заврши, потсетувајќи ги при тоа дека Државниот управен инспекторат постојано е на терен и ја мониторира работата на општинската администрација, како и тоа дали се запазуваат предвидените рокови. Како предмети за кои се уште нема одлука ниту за прекинување на постапката, ниту пак легализација се водат повеќе од 67.000. Најмногу од нив, според сознанијата на Фактор има во Куманово, Шуто Оризари, Липково, Струга и Карпош.

• Куманово – 5.404
• Шуто Оризари – 4.498
• Липково – 4.449
• Струга – 4.157
• Карпош – 4.030

Владата годинава одлучи и легализацијата на доградени тераси во станбени згради и тераси пренаменети во станбен простор,  да биде едно евро по метар квадратен. Пред тоа надоместокот за легализација на тераси во Скопје во зависност од општините чинеше над 100 евра. Со законските измени, 60 проценти од приходот од надоместокот за легализација го добива Град Скопје, а останатите 40 проценти за општините во градот Скопје на чие подрачје е изграден бесправниот објект. Градоначалници и раководители заработија кривични пријави   Во постапката за легализација, неколку градоначалници и раководители на сектори за урбанизам заработија кривични и прекршочни пријави.  Како што Фактор веќе објави, инспекторите од Државниот управен инспекторат, во спроведените контроли откриле серија неправилности, поради што превземале и соодветни мерки. За целата ситуација во која инспекторите веќе поднеле пршочни и кривични пријави за градоначалбниците и раковидутелите, детално била известена и владата. За какви точно злоупотреби и малверзации во процесот на легализација се теретат градоначалниците и раководителите, никој не сака да открие, ниту пак официјално да потврди дека има поведено некакви постапки. Извори за Фактор, кои работеле на контрола на случаите велат дека во некои општини, спротивно на правилата се примале барања за легализација и по завршувањето на законски утврдениот рок за легализација. “Имено, на оние што сакале да легализираат објекти откако рокот за тоа истекол, тоа  им било овозможувано така што службите им давале бројчиња од старите предмети. Па така на едно бројче, кое треба да се однесува за еден предмет за легализација, некаде се воделе и по неколку предмети. Веројатноста дека за таквите услуги се наплатувало и екстра е отворена“, велат нашите извори. С.Н.